ភ្នំពេញ៖ នៅយប់ថ្ងៃទី៨ ខែមករា ឆ្នាំ២០២៥ អ្នកនាំពាក្យអគ្គស្នងការនគរបាលជាតិ បានបញ្ជាក់ពីការចាប់ខ្លួនជនសង្ស័យម្នាក់ ពាក់ព័ន្ធនឹងការបាញ់សម្លាប់លោក លឹម គីមយ៉ា អតីតសមាជិកសភាមកពីគណបក្សសង្គ្រោះជាតិ ដែលបច្ចុប្បន្នត្រូវបានរំលាយ។ ហេតុការណ៍បាញ់សម្លាប់លោក លឹម គឹមយ៉ា នេះបានកើតឡើងកាលពីថ្ងៃទី៧ ខែមករា ឆ្នាំ២០២៥ នៅទីក្រុងបាងកក ប្រទេសថៃ ។
ជនសង្ស័យមានឈ្មោះ អេកាឡាក់ ភាណយ (Ekkalak Pheanou) ជនជាតិថៃ កើតឆ្នាំ១៩៨៣ និងជាអតីតនាវិកយោធា ត្រូវបានចាប់ខ្លួននៅខេត្តបាត់ដំបង កាលពីរសៀលថ្ងៃទី៨ ខែមករា បន្ទាប់ពីបានរត់គេចពីប្រទេសថៃភ្លាមៗ។
លោក លឹម គីមយ៉ា កើតឆ្នាំ១៩៥១ មានសញ្ជាតិខ្មែរ និងបារាំង ត្រូវបានគេបាញ់សម្លាប់នៅវេលាម៉ោងប្រហែល ៥និង៤៥នាទីល្ងាច កាលពីថ្ងៃទី៧ ខែមករា នៅផ្លូវលេខ១៣ សង្កាត់ប៊ូរិននិវេត ខណ្ឌព្រះនគរ ក្រុងបាងកក។ យោងតាមអគ្គស្នងការនគរបាលជាតិ អាជ្ញាធរថៃបានបើកការស៊ើបអង្កេតភ្លាមៗបន្ទាប់ពីហេតុការណ៍នេះ ហើយអាចកំណត់អត្តសញ្ញាណជនសង្ស័យឈ្មោះ អេកាឡាក់ ភាណយ។
ក្រោយពីបានប្រព្រឹត្តបទល្មើសរួច ជនសង្ស័យ ឈ្មោះ ភាណយ បានភៀសខ្លួនចេញពីទីក្រុងបាងកក ហើយឆ្ពោះទៅខេត្តមួយក្បែរព្រំដែនកម្ពុជា។ ឆ្លើយតបនឹងសំណើសុំកិច្ចសហការពីនគរបាលភូមិន្ទថៃ អគ្គស្នងការនគរបាលជាតិកម្ពុជាបានបើកការស៊ើបអង្កេតយ៉ាងម៉ត់ចត់ ឈានទៅដល់ការចាប់ខ្លួនជនសង្ស័យនៅវេលាម៉ោងប្រហែល ១ និង ៥០ នាទីរសៀល ថ្ងៃទី៨ ខែមករា នៅភូមិព្រៃស្វាយ ឃុំព្រៃស្វាយ ស្រុកមោងឬស្សី ខេត្តបាត់ដំបង។
ក្រោយការចាប់ខ្លួន ជនសង្ស័យ ឈ្មោះ ភាណយ ត្រូវបានបញ្ជូនទៅកាន់ស្នងការដ្ឋាននគរបាលខេត្តបាត់ដំបង ដើម្បីចាត់ការបន្ត។ តាមពិធីសារផ្លូវច្បាប់ ជននេះនឹងត្រូវបញ្ជូនទៅកាន់ប្រទេសថៃវិញ នៅពេលបំពេញនីតិវិធីចាំបាច់ ស្របតាមសំណើរបស់នគរបាលភូមិន្ទថៃ៕
